المختار
من شعر مؤيد العطار
شعر شعبي

من منشورات مكتبة الامام امير المؤمنين عليه السلام العامة فرع العباسية

بسم الله الرحمن الرحيم
المقدمة
الحمد لله رب العالمين والصلاة والسلام على اشرف المرسلين محمد واله الطيبين الطاهرين وبعد
فان الادب مهما تعددت الوانه وفنونه يعتبر وسيلة للتعبير عن هموم الناس ومشاكلهم واحاسيسهم ومنه الادب الشعبي والذي ابدع فيه شعراءه فجاءوا بصور ربما عجز عن الكثير منها شعراء الفصيح
ويسر مكتبة الامام امير المؤمنين عليه السلام فرع العباسية ان تقدم هذه المختارات الشعرية لشاعر قدير متمكن من مفردته الشعرية من شعراء الكوفة الشعبيين الا وهو الاستاذ مؤيد العطار
من هو مؤيد العطار
هو مؤيد خليل ابراهيم العطار من عائلة كوفية اصيلة انجبت ادباء فشقيقه الدكتور صاحب خليل ابراهيم والحاج محمد حسين خليل العطار
ولد الاستاذ مؤيد سنة 1952 ميلادية في مدينة الكوفة ، وفيها اتم دراسته الابتدائية والثانوية وتخرج من معهد الصحة الحيوانية عام 1980ميلادية
تميز بكتابة القصيدة الشعبية الحديثة
وبدا نظم الشعر في عام 1969 م
له مشاركات واسعة في الاحتفالات والامسيات الشعرية ،
نشر العديد من قصائده في المجلات المحلية ، كما كتب الكثير من البحوث والتراجم للشعراء الشعبيين ونشرت في مجلات عديده منها ( السنبلة ، الابرار ، الكوثر ) وغيرها من الصحف
اسس خيمة الشعراء الشعبين في الكوفة مع مجموعة من شعراء الكوفة منهم : امين الجبوري وشهيد الحلفي وغطريف و جاسم العريفاوي واخرين وانتخب رئيسا للهيئة الادارية لها
ما زال يواصل نشاطه الشعري وله ديوا ( جرح وملح ) في طريقه الى النشر
ادارة المكتبة
عين الكلادة
من يومج تعزفين لحن مكابرج بالمستحه
وليومج على المستحه المكسور الخاطر
لايبه
ومن يومج
اعروس بدويه وعلى اجتاف الدنيه
تمشين بغنج
وليومج بثوب العرس تزهين
رغم النايبه
ولليوم سورج نار يلهب غيظ
عل رادت تبوك
الكحله من عينج غصب
متكالبه
وتنكص ادين الي تمس معاضدج
لليوم طبعج حيدري وشنيارج يكص الحديد
ويطفي ظن الخايبه
لليوم طبعج حيدري وحضنج دفوا
لكل النفوس الثايبه
ولليوم شيخ الطائفه بتاج الرسول
يرتل ايات الجليا ويشد روح الحاضره
بالغايبه
ولليوم يا ملح الشعر نكاد شوكج يرف بالشريان
يا ماي الوفه اليغسل ذنوب التايبه
يا مثوه ابونه وسيد الطوفان يا ارض الغري
الما عبت عليها فعلها امعايبه
يا خيمة اهلي وعزوتي وشحمة العين الذايبه
والله يا ملح القوافي لخاطرج
كل القوافي تموت الي فدوه الي
منغير ديه ولا طلب ومطالبه
والله يا عين الكلاده
الماخدش حسنج خبيث
وبيج حد مخالبه
والله يا هيبة علي
لو ما علي وانت
انطوينه بطوية النسيان
والنسيان سود طلايبه
ولو ما علي وانت
اليصير يصير
وسحده اليطب وادي السلام
ويبجي بيه مصايبه
ولو ما علي ...............
ولو ما علي ...............
ولو ما علي ...............
وتبقين بسم الله وعلي
تاج على راس الدنيه يا ارض الغري
وتاجج علي سيف الاله الغالب
الذلت اله كل السيوف الغالبه

حوبة الشباج

شكوى واعتراف في محراب القمر
لسيدي ومولاي قمر بني هاشم ابو الفضل العباس
الصبر جم دوب
الحزن جم دوب
وجم دوب الوكت يفتر عكس دولابه
بعدها سيوف هولا كو تحز بينه
وبعد ضيم المغول
اعله الخبز مكتوب
ومصلوبه الفريضه بذمة بنادم
رخيصه باب بيت الله التحنه بحوبة المصلوب
او وكع ماي الوجوه ابين حجاج الفساد
وسيف ابن ملجم جرح والدم شرف مسلوب
وحسبناها السنين بشوغة الوادم والف خيعون بخته الضاع بيها بسبرة المحسوب
وشربناها الرذيله بتاج ابو سفيان
وعرفنه النفاق بلكمة المغصوب
وغفت بالذل تناغي الذل
عجيبه وعجبه دنيانه
اشبلاها اشحزماهه احزام
تصحه اعله الهظم وتنام
تتباهه بخطايانه
وكضت بينه اعله جف عفريت
نطلع من حلك حانه بالف يا حافظ وستار
وانطيح بحاك مانه
وطواويس الملوك اتصلي للدينار
تذبح آية الباري اعله قرانه
وسيف الري يلوذ سنين بحمانه
غسل عاره بضمايرنه وجله زنجاره بزمانه
غسل عاره بضمايرنه وسلب غيرة بكايانه
وتحنه بدم رسول الله
تحنه بنحر ابو الاحرار باسم الله
شرب من هيبتك مولاي
صب سمه على الجفين
من صله
حرام نعيش يا دنيا وحرام نعيش طمنه بكاع الله
حرام نعيش يا سر كرباه المحجوب
نور الله برمح ينزار
واحنه اعله الذنوب ذنوب
سكته وزنجرت بالخوف
محد ما ينسه طبعه الماي
وينكر طينته ويروب
ننويها كبل لا تطفح الرية بسنه وسنتين
عود انتوب
***
يا صوت الضمير… العانك الدنية 000
وتعب بيها الحسبها حساب000
بجاه الله الجبير000وايته ونوره00
وكتابه الما علاه كتاب00
يحزام ابو اليمه البيك حد الموت 00حد المرجله00
ونعمين من طبعك يحد صواب
نخيناكم واهلها انتم كفو00 يا خيرة الاطياب00
ولو 00ما نسوه ذره عتاب 00
لجن حدر الذنوب سنين00وده الضيم بيها وجاب00
وبجينه ارواحنه 000ولا فاد
نستاهل لون نهجس 00بالعيون البجت تيزاب
وبجيناكم بلا منه00
وطبع عين اليحب تبجي00
بكثر دم كربله الماعاشر الذله00
ونزف ما ساوم النشاب
يسيف وما يلمه كراب
اجيناك بكايا الروح 00بهموم العليها بكل خطاياهه
علك ومعاشر المحراب
نطوف بهيبتك مولاي
بلجن حوبة الشباج تفتح باب
بلجن حوبة الشباج تفتح باب



عذرا وطني

منين ابدي يا وطني ..
ديرة هلي وموطني ...
يا صاحب الغانمة ...
بختك يحامي الحمة ..
الياذيك كون بعمه
بشارتك يا وطني
منين ابدي واحجي الحجي
وابجيك و اشبع بجي
شضل بيك ما منحجي
حرموا خيرك علي ... حل بس على المنتجي
وانه اعله نية هلي .. ضنيتهم منهلي
وضاع العلي والالي
ببرتك يا وطني
منين ابدي من يا كتر ؟ من يا صريفه ويا قصر
من يا سنه ومرحله
ابديها من يا شمر ؟ من يا مناحة وكبر
كل يوم الك كربله
ابديها من قصتي
لو من عذاب اخوتي
لو من سهم حرمله
جا وبني يا وطني
يل كاعد على الذهب
راونه بيك العجب
وارقه انواع الويل
والوان من التعب
ما فلح بس اللعب
وخسران كلمن تعب
والموت للما لعب
للجير خله وحيل
يا قسمة المايله
مسرح وكلمن اله
للما يرد عايله
واهل الرده والبله
مسكين يا وطني
نفطك سبب لوعتي
حطني على جف غربتي
وبي عطش جوعي
يا هيه يصبر الصبر
مشيتي على الجمر
والنار بضلوعي
يذبحني بيك القذر وبدمي صرت الجسر
وما الي بكاعك شبر صدك يا وطني
مو خلص بينه العمر
ما بين جوع وفكر
وللغير درك يدر رغمن عليك وجبر
تدري اشحملنه شكثر ومشابج ويه الصبر
يعصرنه بسمك عصر
وجبارتك يا وطن
النه ولمن رضعن
يجرفنه سيل المحن
هم تدري يا وطني
بيك ارضعت وحشتي

ورضيت انه بقسمتي
وزادي صفه نوحي
خيمة هلي وعزوتي

ملحك طعم خبزتي
يا اغله من روحي
يا حسرتي والالم
ضل بيك بس العلم
وزيف اليخطه القلم
زيف اللسن والقلم
لبيك يا وطني
كالوها عنك سمح
رشو جروحك ملح
وصبو عليك الهم
واحنه على جرف الجرح
يشربنه نزف الجرح
وبطيبتك ننذبح
جم مره جم وجم
وكلنه بزوال الظلم
ننسه الشكه والسكم
تاليها لفنه الهظم
يا وسفه يا وطني
كلنه الاجونه كفوا
لاهم اجناب ولفوا
والمشكله انحلت
منك وبيك الاجه
علكنه بيه الرجه


والفرحه ما تمت
ست ميت مله وحزب
ما بين صدك وجذب
بيها الغيور المحب
وبييها اليريد النهب
واختار يا وطني
عذرا الك وطني

صرخه الحك
لسيدي ومولاي أمير المؤمنين علي بن طالب عليه السلام بمناسبة يوم الغدير …


منبر ورايه وعلي وهمس العيون
وصوت داعي الحك يكر اعيرنها
وصرضة الحك لون ما يشبهلها لون
ولون شمس الله ايتباهعه بلونها
*****
راية الحمد وضوه وسر الأسرار
وباب طه وخازن لأسراره
سيد الأمه اوولي وتاج الاحرا
وعزة العالم وصوت احراره
ودورة الحك تلكبه لوسرعزها دار
اتدور إله .. شما دارت الدواره
نبض بدمانه رغم ظن الظنون
الخاب ظنها وعطبت .. بظنونها
مادرت ذات الوصي اشتحوي مضمون
والشمس عين الشمس مضمونها
****
العهد ذمه وغيرتك للذمه طوك
وصلت بمحراب جاهك يا علي
وغير ميزانك علي انسحكت إحكوك
وآنت ميزان العدل باسم العلي
هيبة وشراع الشرف بيدك يلوك
وجاه امين الله لبو جاه علي
ايعون الماطلب لسنينه عون
وعون منصرتلها ضي خيعونها
غيث للدني العبث بيها فرعون
وعصا موسى البيها ذل فرعونها
*****
يا ضير الدنيه يا شوف اليشوف
وعمت عين آلما تشوف بشوفها
كعبة الله وبيها سر الله يطوف
والشرف للعنده حظ يطوفها
فلك نوح وإلك تمتد الجفوف
تبايع وغمها التشح بحفوفها
عروة الوثقى وشرف اسمك يصون
شرف من بايع صدك ويصونها
اركابنه بكد صبرك إمحمله ديون
ونطمع إبجاه تفك ديونها

جفين
جفين 000
جف للعلكمي00
وجف موت الاحمر00
يانعم جفينك00
جفين
000ونبار العطش
000ماي وعطش00
واربع اصابع بينها وبينك00
جفين 000
تحضن رايتك00
جف غيره00
جف يفضح وفاها00
لدينك00
جفين
00سور الكنطره00
ولختك وفه00
وخيمة صبرها امعمد بضلعينك00
جفين شبكن بالمهد صعيبة علي00
وبالغاضريه توسمن00
بشفاف صبر الطف00
بتاج سنينك00
جفين من شح الكرم000
صارن كرم000
واتكطعن 00
والزود من ضي عينك

حيل برنوا
مهداة للشاعر محمد علي الصباغ


شما عتكت البرنوا ...حيلها خيال
والمهرة فشكها ... بغيرته تصهل
ومشابج مشابج ... ويه جف الموت
ما لاذت بسده... ومنه ما تجفل
بعدها بحيلها ... وذاك الطبع .. طكتين
وحده تشل دبيب الخوف.. وحده نذار موت
وموت ما تمهل
بعدها بكل عشكها تغازل الدنيه
بعدها بخير بيها الخير
حد صوابها يهلهل
بعدها بحيلها البرنوا
تحيه ومحمل وسندان
عمد بيت الوفه وبيبان
ترفه معدله اتعدل
بعدها هلال عيد لجيته بشاره
بعد لاطفالنه علوج وفرح تحمل
وينكص لسان اليلفظ الشينه عليها وباطل يجمل
بعد بيها الرجا وما تعبت البرنوا
تضل وجه بوجه للموزمه ذراعين جالخل الجابل الخل
مو مثل اليؤراوغ بالحجي وجهين
وسم سمين حقده من الظهر يكتل

كلش عيب
كلمن قسمته بدنياة والمكتوب كون يصير
والمكسور جنحينه
جذب بجناح غيره يطير
وبنادم اخو بنادم
لون يصحه الضمير ويصدك التعبير
وغلطان التشلبه وسابك سنينه وتوهم
حسب تعسه جبير
وغلطان النسه اشكبر
ذليا بشوف عين النايبات ازغير
والدنية تحجي دولاب من يفتر
يشيل الماعرف كدره وينزل بالشرف
واهل الشرف بالجير
واحنه برحمة الدولاب
بينه السحك بالدينار وجدانه
وحز بيده ضميره وفكد ذاكرته
وترس جيبه حيايه وذله وبسامير
وبينه
الياكل بقهره عزيز وعزته غموسه
اينباهه ابكثر مابيه اهموم ادير
ومو عيب الشرب بالمستحه اهمومه
وعجن جبده ويه خبز الشعير
عيب اعله التبطر ما عرف روحه
وعيب بسكم ناسه الجوح جروحه
وعيب المشه بعين وعين جن من شاف
دمه ولحمه منه وبيه عزوته كباله مذبوحه
وكلش عيب
عل يدعي بيها وغلس على العيب
ما جنها التموت ابكثره مفضوحه
وعيب المايحك جلده بضفره وما يشد لهله
شرايين الكلب والكلب مرجوحه
وعيب المايطيح
لطيحة الوجعان يتلكاه
وعيب الما وكف وكفة شرف بالموزمه وياه للوحه
وعيب الما جلت مركته على زياكه
ولعب بيها الغشيم
وروبع بنوحه
وعيب الي نشف ريكه
اعله جفة بير
ونحجيها بصراحة ناسنه الطيبين
الفكر مو شحة الليره
ولا شحة الخبزه التسلب الغيره
الفكر فكر الشرف والجاه والتقدير
وخل تسمع حماميل الفلوس الما ضنكهم ضيم
تره شما شيخهم ينطي ويظل ينطي ويحط روحه
تصيح الناس شعره ومن جلد خنزير

لاتظن

احجي باليرضيك وحدك
يلي ما تعرف حقيقتنه وضعنه
وكول مرخوص شتكول
البيك بيك بلاية شك
والبينه بينه وهذا من خالص طبعنه
اشكد حجيت شكثر
ما عينك انكسرت واخجلت
من هل دمعنه
اشكد بعت بينه واشريت
انسيت نفسك
جنت واحد من ربعنه
واحنه ما ساومنه بيك
ولا حجينه بلغثة لسانك

ولا للعشره بعنه
سا ومت ياما
اعله كيفك حسبت كلشي انكضه
وبالدنيه ضعنه
ما يضيع العرف دربه ومانضيع
شما شهك واختنك بسمومك
بشمعنه
ولا تظن اخسرنه جاهك
هذا حال الدنيا
ميزان لخسارتنه ونفعنه
ولا تظن تنتهي لحدك
باجر الواحد
تره بعشره نفعنه

ابوذية

علي للحكل .. مع الحك ..ما شبيهه
شبه يشبهله بيها ..ما شبيهه
علي من دونه نار .. وما شبيهه
اليبغضه .. وحبه للجنه هويه
زهيري
تاهت بارضها الارض بين السمه والسمه
وعاندت ويه السمه ضد السمه والسمه
وسواد وجهه الذهب من عار السمه والسمه
وطال اعله صبره مادام اله من دمه
ودمدم رعيد النفس عالنفس لامن دمه
وبطلت صلاة التوضه بلا دمه من دمه
والبكه من الصالحه بهاون صلاته يرض
مستحيف الما اجه ولا باليجيله يرض
ميت بسم حي جذب عالدنيه نفسه يرض
ولا هيه ارضه الارض لا والسمه والسمه

ولاية علي من العلي .. من كل شر حاجبه
وتبت يدا من توهم للشمس … حاجبه
وتب من دعه وادعه 00عينه علت حاجبه
ويبكه علي يا علي إشدارت الدورة العلي
واحنه إبحمه ولايته .. بعين القدير العلي
وبالشده من نلتوي 00نشجي وندبه لعلي
والما يندبه العلي.. ما عاد إله حاجبه
الفهرس

عين الكلادة
حوبة الشباج
عذرا وطني
صرخه الحك
جفين
حيل برنوا
كلش عيب
لاتظن
ابوذية وزهيري